бақылау пункті

(Наблюдательный пункт)

қарсыластың және өз әскерлерінің іс-әрекетін және жергілікті жерді (акваторияны) бақылау үшін арнайы жабдықталған орын. Б.п. жергілікті жерде (окоптарда немесе жабық құрылыстарда, ағаштарда, биік ғимараттарда, т.б.), сондай-ақ жылжымалы жерлерде (танкілерде, жаяу әскер ұрыс машиналарында, бронетранспортерлерде, тікұшақтарда) орналастырылады. Б.п. атқаратын міндеттеріне сәйкес бақылау және барлау аспаптарымен жабдықталады. Б.п-нен бақылауды үзіліссіз (тәулік бойы) штаб командирлері мен офицерлері және бақылаушылар жүргізеді; бақылау нәтижелері бақылау журналына тіркеледі. Ұрыстың кейбір кезеңдерінде құрамалар мен бөлімдердің Б.п-нен әскерлерді басқаруды жүзеге асыруға болады. Жер үсті артиллериясында, қажет жағдайда, негізгі Б.п-нен басқа алдыңғы қатардағы және қапталдағы Б.п. жабдықталады. Алдыңғы Б.п. қарсыласты барлау, жалпы әскери бөлімшелермен тығыз бірлескен қимылдар жасау және артиллерия атысын дәлдеу үшін құрылады. Қапталдағы Б.п., негізінен, нысананы белгілеу, атыс нәтижелерін бақылау және атысты түзеу (дәлдеу) үшін қызмет етеді. Қорғаныста қарсыласты жаңылдыру үшін жалған Б.п. құруға болады. Ұлы Отан соғысында және одан кейінгі кезеңде бірлестіктерде, жалпы әскери құрамалар мен бөлімдерде Б.п. басшылық пункттің күштері мен құралдарынан құрылды және оның элементі болып табылды.